Lub Siab Tsis Teb

Tsis xav hais tias ntau niaj ntau xyoo tau nrhau tag
Los kuv tseem xav txog koj ua kuv siab tsis kag
Tsis xav tau tias ntau caij ntau xyoo tau nrhau los
Ua cas kuv thiaj tseem nco koj ua hnub ua hmo tos

Tsis paub hais tias yog kuv hlub koj tsis ua siab coob
Tsam no kuv puas yuav nug lub siab tsis txawj thoob
Vim nug lub siab los lub siab teb tsis cuag ncua
Nug lub tsws los lub tsws tsis paub teb kom txua

Yuav ua zaj twg koj thiaj rov tau los rau kuv ntsib
Vim lub caij tsis ua kom wb kev hlub rov los sib pib
Yuav ua li cas koj thiaj yuav hais lus rau kuv hnov
Vim lub caij nyoog ntsiag to tsis ua ib suab ib xov

Yuav hais npaum cas wb kev plees thiaj li nyob ruaj
Kuv nug lub caij los lub caij teb tsis tau kom muaj
Yuav hais li cas thiaj rov pom wb kev hlub kev hluas 
Kuv nug npaum twg los lub nyoog tsis teb tsis xyuas

Tej zaum vim wb tau tso kev sib hlub tseg tiag lawm
Nrhiav npaum cas los lub caij nyoog teb tsis tawm
Vim wb tau quas wb kev plees kev raug tiag sis hlo
Rov tshawb li cas los lub caij lub nyoog thiaj ntsiag to